ধনাত্মক চিন্তাঃ৩

ধনাত্মক চিন্তাঃ৩ 

বৃহৎ সফলতা আৰু প্ৰকৃত সুখৰ গোপন ৰহস্য হৈছে: যিসকল ব্যক্তিয়ে সহায় বা উপকাৰৰ কোনো প্ৰতিদান, বিনিময় নিবিচাৰে; তেওঁলোকেই প্ৰকৃতাৰ্থত নিস্বাৰ্থ আৰু সুখী ব্যক্তি। আৰু তেওঁলোকেই জীৱনত একো একোজন মহান সফল হিচাপে পৰিগণিত হব পাৰিছে।

সহায় বা উপকাৰৰ প্ৰতিদান, বিনিময় বিচৰা মানেই স্বাৰ্থপৰতা, নিকৃষ্টতা, ঠেক মনোবৃত্তিৰ পৰিচয়।

ধনাত্মক চিন্তাঃ ২

ধনাত্মক চিন্তাঃ ২ 

আমাৰ জীৱনৰ প্ৰতিটো কাৰ্যই তিনিটা স্তৰ অতিক্ৰমণ কৰিবলগীয়া হয় – উপহাস, বিৰোধিতা আৰু পিচত গ্ৰহণযোগ্যতা। যিসকলে নিজকে তেওঁলোকৰ কাৰ্য সময়তকৈ আগত বুলি চিন্তন কৰে, তেওঁলোক ভ্ৰান্তধাৰণাৰ বলি হোৱাটো নিশ্চিত।

ধনাত্মক চিন্তাঃ ১ (২৯-১২-২০১৯)

ধনাত্মক চিন্তাঃ ১ (২৯-১২-২০১৯)

ইতিবাচক চিন্তাৰে ধাৰণা এটি বাচি লওঁক। এই ধাৰণাটোক জীৱনৰ লক্ষ্য হিচাপে গ্ৰহণ কৰক; ইয়াৰে সপোন দেখক; ইয়াৰে চিন্তন কৰক আৰু এই ধাৰণাটোৰ সৈতে একাত্মা হৈ জীৱন ধাৰণ কৰিবলৈ শিকক। আপোনাৰ দেহ, মন, সীৰৰ ৰন্ধ্ৰে, ৰন্ধ্ৰে এই ধাৰণাটোৰ সোঁত প্ৰবাহিত কৰিবলৈ প্ৰয়াস কৰক আৰু এই ধাৰণাটোৰ বাহিৰে মনলৈ অহা অইন চিন্তাসমূহক একাষৰীয়া কৰক। কাৰণ ইতিবাচক চিন্তনৰ সময়ত অহা চিন্তাসমূহৰ সৰহ সংখ্যকেই নেতিবাচক চিন্তা।

এয়াই হৈছে জীৱনৰ সফলতাৰ পথ আৰু এই পথেৰেই মহান মহান আধ্যাত্মিক মনীষীসকলে আধ্যাত্মিকতা লাভ কৰিছিল। 

হেৰাই যাবলৈ ধৰা আমাৰ ঘৰুৱা আৰু থলুৱা ফলমূল

হেৰাই যাবলৈ ধৰা আমাৰ ঘৰুৱা আৰু থলুৱা ফলমূলঃ

(অতুলনীয় অন্তৰীপৰ ২০১৯ ডিচেম্বৰ সংখ্যাত প্ৰকাশিত প্ৰবন্ধ)

দিব্যজ্যোতি শইকীয়া

প্ৰকৃতিৰ চেনেহৰ জীয়ৰী অসমত এতিয়া ফলমূলৰ বতৰ আম, কঠাল, জাম, লেটেকু, পনিয়ল, মধুৰিআমেৰে ভৰি পৰিছে গোটেইখন। হাটে বজাৰেও ফলৰ সমাহাৰ। একেই দৃশ্য আমাৰ বাৰীবোৰতো। কাৰোবাৰ বাৰীখন যদি পকা আমৰ ঈষৎ ৰঙা-হালধীয়া ৰঙে জাতিষ্কাৰ কৰি ৰাখিছে, আন কাৰোবাৰ বাৰী আকৌ ক'লা জামু অথবা লেটেকুৰ ৰঙেৰে চালে চকুৰোৱা হৈ জকমকাই উঠিছে। আচলতে ফলমূল বছৰৰ বাৰ মাহেই থাকে। কিন্তু অসমত জেঠ, আহাৰ, শাওণ যেন ফলৰেই ভৰপক ঋতু। প্ৰকৃতিৰ ৰূপ, গুণ আৰু স্বভাৱ এই আটাইবোৰেই বিস্ময়কৰ! প্ৰকৃতিৰ স্বভাৱ খেয়ালী আৰু ৰূপ-গুণ অতুলনীয়। প্ৰকৃতিয়ে সসাগৰা পৃথিৱীত সকলো প্ৰয়োজনীয় বস্তুৱেই দান কৰিছে। প্ৰকৃততে সমস্ত প্ৰাণীকুলেই প্ৰকৃতিৰ ওপৰত নিৰ্ভৰশীল। এইক্ষেত্ৰত তিলমাত্ৰও কাৰ্পণ্য নকৰাকৈ প্ৰকৃতিয়ে প্ৰাণীকুলৰ বাবে প্ৰয়োজনীয় সকলো বস্তৰে যোগান ধৰি আহিছে। নানা তৰহৰ ফলমূল মানৱ সমাজৰ প্ৰতি প্ৰকৃতিৰ এক অনন্য উপহাৰ।